Rev 21 | TPZ | STEP | Eöß to ep in o oeh me a akis voon to tavus maß. A akis me o oeh vamoaan to hik ee, me a tahiß to hikta teß hah non.

Revelation of John 21

1 Eöß to ep in o oeh me a akis voon to tavus maß. A akis me o oeh vamoaan to hik ee, me a tahiß to hikta teß hah non. 2 Eöß to ep pet me in a vöön voon vasioß vëh a Jerusalëm to kunah taneß maß manuh pa vöön va kin pe Sosoenën. Eß to teß me non o vatëk vih vamanih pe köövo tövaen, pareß vamatop ke non e voe peß. 3 Eöß to tënan o vaato apuh to taneß maß pa ö ihihoß pe Sunön to soe vakis maß pan, “Pënton öm! E Sosoenën se teß vaßpeh me e non pa ma napan, eß se teß topnin non raoe, kee teß ne a ma napan pe Sosoenën. 4 Eß se hiuk vaßnaß këh en pee pa hunun matëëre, ka napan hikta se mëtmët hah ne, me ahik hah to kokoman punis, me a hikta kon kamis. A ma tah to teß voh ne to hik kurus rakah ee, me ahik hah to vaokook.”

5 Ka Teß vëh to ihoß non pa ö ihihoß pa teß sunön soe pan, “Pënton ah! Eöß to vavateß vavoon hah noß a ma moeh tah!” Pareß soe pet pan, “Kiun töön a ma tah varih manih, suk a soe vëh a pah man rakah to onöt e non pa ö no a ma napan kurus se vaman rakah ee peß.” 6 Eß to soe pet ka neoß pan, “A ma tah kurus varih to tanok vahik ee. Eöß varoe kuru a taneo pa ma moeh tah, paröß vasuksuk hah noß maß. Eöß a Taneo in a ma tah kurus, me eöß a Vahik in a ma tah kurus. A teß se keh manoe non, eöß se heß eah a ruen to taneß no maß pa rën va po toßtoß. Eß se kon vamanih po heß peß, a hikto voen nën. 7 Ka teß se keh öt vakis non o vaman ko onoah po vapus va pa taateß hat, eoß se heß eah a ma tah poë varih, köß se teß noß e Sosoenën peß, keß se teß non e koaß peöß. 8 Ivëhkëk, eteh to nanaöp non ko vahuk hah këh o vaman, me eteh to hikta vaman non, me a nap nonok a ma moeh taateß hat rakah, me a ma teß ipip vamët teß, me a ma teß rëhrëh, me a ma teß to ororaß ne o upöm teß, me a ma teß to vasunön ne o sosoenën vapikpiuk, me a nap pikpiuk, ee a pap teß poë varih se nö pa koveß suraß ororan to ësës tamoaan non po vös salpaß. Eß a vapöök mët.”

A Jerusalëm Voon

9 Ka paeh va pa tönim me a pöök ankeroß varih to öt ne pa tönim me a pöök toep varih, to teß me ne a ma tah hat marën a miröß a napan pa vahik o heve pe Sosoenën, to nö maß peöß pareß soe pan, “Nö mah, köß vataare a oah e muriaknan pa Soneß Sipsip to vaen vahik me en peß.” 10 Ka Tuvuh Vasioß puh rakah en manih peöß, ka ankeroß me en peöß manuh pa tope a pah apuh, ko vakin vörep. Eß to me a neöß pa vataare a vöön voon vasioß vëh, a Jerusalëm, a vöön pe Sosoenën to kunah taneß maß pa vöön va kin. 11 O maaka kikis apuh pe Sosoenën to ëman non pa vöön pamëh. O ëman peß to ep vamanin rakah e non, vamanih pa vös saspaß to paraß maaka vörep va non manih po siroak. 12 A vöön apuh pamëh to teß non a kiikin va kin, pareß teß non o havun me a pöök ankeroß, a ma papaeh to sun nö ne matan o havun me o pöök hopaß. Manih po hopaß to kiun non a ma ëhnëëro havun me a pöök sipuiira napan va Israël. 13 Eß to teß non a ma kukön hopaß pa pah papan, o kukön pa ö no a potan to pepeah ke no maß, ko kukön pa ö no potan to kukunah ke non, ko kukön pa papkiruk, me o kukön pa papmatö. 14 A kiikin in a vöön pamëh nee to eok voh keß tok non na pa tonun in a havun me a pöök vös, keß ötöön vakis non maß a kusin a kiikin, pareß teß non a ëhnëëro aposol pa Soneß Sipsip to kiun ne nën.

15 A ankeroß vëh to vavaato me voh a no neöß, to öt non o tokon nee to nok voh pa gol marën a vatoe a rë pa vöön, me a ma hopaß, me a kiikin. 16 A vöön a totoopin pa taanaß ö noton, a papanöß, me a rë pa vöön, eß o pöh vatoe rakah. A ankeroß to vatoe en pa rë, me a papanöß pa vöön po tokon peß, ka vöön to antoen va non manih pa 2,400 kiromitaß.

17 Ka ankeroß vatoe en pa poß pa kiikin keß antoen va non manih pa 66 mitaß. O vu vatoe pamëh no a ankeroß to vatet no a napan to vavatoe ne a ma tah. 18 A kiikin pamëh to tavi non a vöön, ne Sosoenën to eok po vös saspaß, ka vöön to eok non pa gol varoe, keß ëman va non manih po siroak. 19 O vös varih to vakusin ne pa kiikin pamëh, to eok ne pa ma vu vös voen vapeah rakah. A vös vih vamomoaan to vakusin non pa kiikin, eß a vös saspaß. Ka vapöök vös, eß a vös vovoaßruvi, a vös sapaëaß. Ka vakön vös, eß a kakaare, eß a vös aget. Ka vataanaß, eß a vös pepereß, eß a vös ëmeral. 20 Ka vatönim, eß a vös sadönikis, eß to ereraß ko kakaare. Ka tönim me a paeh, eß a vös konilian, eß a ereraß. Ka vatönim me a pöök, eß a vös krisolaët, eß a totomoen. Ka vatönim me a kukön, eß a vös beril, eß a meh vu vös pepereß. Ka vatönim me a taanaß, eß a vös topas, eß a meh vu vös totomoen. Ka vahavun, eß a vös krisopres, eß a pepereß me eß to totomoen. Ka vahavun me a paeh, eß a vös haëasin, eß a meh vu vös vovoaßruvi. Ka vahavun me a pöök, eß a vös ametis, eß a meh vu vös ereraß. 21 O havun me o pöök hopaß va pa kiikin poë varih ne Sosoenën to eok po havun me o pöök mök voen vapeah. A ma hanan varih koman a vöön to eok ne pa gol, ko ëman va ne manih po siroak.

22 Eöß to hikta ep noß a Iuun Hinhin Apuh koman a vöön apuh pamëh. E Apuh, e Sosoenën A Kikis Vi vaßpeh me a Soneß Sipsip, ee pon to teß va ne manih pa Iuun Hinhin Apuh. 23 A vöön pamëh, a hikto maaka va pa potan, me a sivö se vamaaka non a vöön, suk o maaka kikis apuh pe Sosoenën koman to ëman ke non pa vöön. Ka Soneß Sipsip teß va non manih po maaka va pa vöön. 24 A ma moeh vu napan se nönö vah ne koman o maaka va pa vöön pamëh. Ka ma teß sunön va pa ma muhin kurus se teßteß ne maß a ma kokoek pee manih peß. 25 A ma hopaß va pa vöön to hikta se papanih ne, ee se teß taperet e ne, suk a hikta popoen manih pa vöön pamëh. 26 A ma tah kokoek me a ma moniß pa napan kurus, ee se teß maß manih peß. 27 Ivëhkëk, a ma nap pikpiuk, me a nap nonok a ma vu taateß hat, me a ma teß rëhrëh, ee se hikta vos rakah pa vöön pamëh. A ma napan varoe varih no a Soneß Sipsip to kiun töön voh a ma ëhnëëre manih komön o puk va po toßtoß tamoaan.